Culture shock လို့ခေါ်တဲ့ နိုင်ငံခြားကိုစစရောက်ခြင်း ကိုယ်ရောက်နေတဲ့နိုင်ငံရဲ့ ယဉ်ကျေးမှုထုံးတမ်းအစဉ်အလာကို ရင်းနှီးကျွမ်းကျင်မှုမရှိပဲ နေသားမကျတဲ့ ခံစားချက်မျိုးဖြစ်ပေါ်တတ်ပါတယ်။
'ရောမမှာနေရင် ရောမလိုကျင့်ရမယ်ဆိုတဲ့' စကားရှိသလို
UK မှာပညာသင်ကြားတာပဲဖြစ်ဖြစ်၊ အလည်အပတ်သွားတာပဲဖြစ်ဖြစ် UK culture ကိုလေ့လာရအောင် ဗဟုသုတအနေဖြင့်မျှဝေပေးလိုက်ပါတယ်။
တန်းစီတဲ့ ထုံးတမ်းအစဉ်အလာ
ဗြိတိန်လူမျိူးများက တန်းစီတဲ့ စနစ်ကို အလွန်နှစ်သက်တာ ဟိုးအရင်ကတည်းကပါ။ UKမှာဘာပဲလုပ်လုပ် တန်းစီတဲ့စနစ်ကို ကျင့်သုံးပါတယ်။ ဈေးဝယ်တာ၊ ဆိုင်မှာစားတာ နေရာတိုင်းလိုလို တန်းစီတာကို တွေ့ရပါလိမ့်မယ်။ ကိုယ်က မတန်းစီပဲ ကျော်တတ်တဲ့အခါကြရင် အများက မျက်စောင်းထိုးတာ ရိုင်းတယ်လို့ယူဆတာ ခံရတတ်ပါတယ်။ တစ်ခါတလေ အများရှေ့မှာ အပြောပါခံရတတ်ပါတယ်။
Thank you (သို့) Sorry ကိုအကြိမ်များစွာပြောလေ့ရှိခြင်း
ဗြိတိန်လူမျိူးများစကားပြောရင် သတိထားမိပါလိမ့်မယ်။ Thank you (သို့) Sorry ကို ဘာသာစကားတွင် ယဉ်ကျေးမှုအရအမြဲထည့်ပြောလေ့ရှိတာကို။
အသေးအဖွဲလေးကအစ ကိုယ့်ကိုသူများကဘာပဲလုပ်ပေးပေး Thank you ဆိုတာပြောလေ့ရှိပါတယ်။ စကားရဲ့အစတွေမှာ သိချင်တာ၊ မေးချင်တာကအစ သူများကိုဘေးဖယ်ခိုင်းတာကအဆုံး Sorry ကိုပြောလေ့ရှိပါတယ်။
ကိုယ့်ဘာသာစကားမှာဆိုရင် အဲလောက်အများကြီးပြောလေ့မရှိတော့ တခါတလေ Thank you မပြောမိတဲ့အခါမျိုးတွေမှာ ရိုင်းသလိုမျိုး သူများ culture မှာဖြစ်နေတတ်ပါတယ်။
'You alright ?' 'You okay ?'ကို Hello အနေဖြင့်သုံးခြင်း
You alright ဆိုတာပြောပြီး ကိုယ်ဖြေနေတုန်းမပြီးသေးပဲ လှည့်ထွက်သွားရင် မသိရင်ကြောင်သွားတတ်ပါတယ်။ ကိုယ်ကဘာမှားနေလို့ သူက 'You okay?' လာမေးနေတာလဲလို့ ထင်ကောင်းလဲထင်တတ်ပါတယ်။
တကယ်တော့ Hello ပြောသလို နှုတ်ဆက်တဲ့အနေဖြင့် သုံးတာပါ။
တံခါးကိုဖွင့်တဲ့အခါ နောက်မှာလူပါရင် တံခါးကိုမပိတ်အောင် ကိုင်ထားပေးပါ။
တံခါးဖွင့်တဲ့အခါ နောက်လူရှိမရှိကြည့်ပြီးမှ ပိတ်ပါ။ လူရှိပြီဆိုရင် တံခါးကိုဖွင့်လျှက်ကိုင်ထားပေးတာ UK ကလူတိုင်းလိုလို ပြုမူတာတွေ့ရပါလိမ့်မယ်။ ကိုယ်အတွက်သူများက တံခါးကိုင်ထားပေးတဲ့အခါလည်း 'Thank you' လို့မပြေရင် ရိုင်းတယ်လို့ယူဆပါတယ်။
